Kooxda Real Madrid ayaa si rasmi ah u shaacisay in tababaraha Carlo Ancelotti uu kooxda ka tagi doono dhammaadka xilli ciyaareedkan. Ancelotti, oo muddo dheer maamulayay kooxda kuna guuleystay horyaalka La Liga iyo Champions League, ayaa la filayaa inuu xilka tababare ka qabto xulka qaranka Brazil marka uu dhammaado heshiiskiisa Real Madrid.
Warka ku saabsan bixitaanka Ancelotti ayaa ah mid saameyn weyn ku leh taageerayaasha Real Madrid, maadaama uu ku guuleystay koobab muhiim ah isla markaana uu soo celiyay guushii iyo tayadii kooxda. Kooxdu hadda waxay qorshaynaysaa inay raadiso beddelkiisa si ay ugu sii socoto guulaha iyo horumarka ay ku tallaabsatay xilliyadii u dambeeyay.
Hadda oo uu kusoo dhowaanayo waqtigii uu ka tagi lahaa Bernabeu, warbixinno ayaa tilmaamaya in Real Madrid ay ka shaqeyneyso qorsheyaal lagu soo beddelayo. Xulashooyinka ugu waaweyn ayaa waxaa ka mid ah tababaraha Bayer Leverkusen ee Xabi Alonso iyo Julian Nagelsmann oo iminka leylinaya xulka Jarmalka.
Xiisaha ugu weyn ayaa ah su’aasha ah cidda buuxin doonta booska uu ka tegayo Ancelotti, iyadoo Xabi Alonso si weyn loogu xanto inuu yahay shaqsiga ugu dhow. Alonso oo hore ugu soo ciyaaray Real Madrid, ayaa la aaminsan yahay inuu leeyahay faham weyn oo ku saabsan dhaqanka kooxda iyo rabitaanka taageerayaasha, taas oo ka dhigeysa mid xiiso leh haddii uu ku laabto Bernabeu isagoo macalin ah.
0 Comments